Tag: Mahesh Pandey Malang

छत्‍तीसगढ़ी व्‍यंग्‍य कविता

1
मोर तीर मोर स्कूल के लइका मन पूछिस
गुरुजी पहले के बाबा अउ अब के बाबा म
काय काय अंतर हे।
मय कहेव बेटा “पहिली के बाबा मन
सत्याचारी होवय, निराहारी रहय
ब्रह्मचारी और चमत्कारी होवय।
और अब के बाबा मन
मिथ्याचारी, मेवाहारी,
शिष्याधारी आश्रमधारी होथे
पहिली कबीरदास, रैदास तुलसीदास होवय
अब रामपाल आशा राम, रामरहीम असन बलात्कारी होथे। ।

2
मंत्री जी ह पेड़ लगाइस बिहनिया
बोकरा वोला खा लिस मंझनिया
रात म बकरा ह बन गे मंत्री जी भोजन
अइसना करिस मंत्री जी ह परियावरण सरंच्छन

3
मोर दोस्त मोला फोन करिस
“मलंग भाई मोला दारू छोड़ना हे”
मैं सुनके बहुत खुस होयव
“बहुत खुसी के बात आय भाई, छोड़ दे”
वो बोलिस “एक ठन दिक्कत हे”
दारू ल काखर पास छोडव ,
इँहा के सब दोस्त मन दरुहा हे ।

4
पाखंड अउ विडम्बना कतका बड़े हे
घर के नाव मातृछाया हे
अउ घर के महतारी
वृद्धाश्रम म पड़े हे ।

महेश पांडेय “मलंग”
पंडरिया (कबीरधाम)



लघुकथा : बड़का घर

जब मंगल ह बिलासपुर टेसन म रेल ले उतरिच तव रात के साढ़े दस बज गय रहिस। ओखर गाड़ी ह अढ़ाई घंटा लेट म पहुंचिस, जेखर कारन गाँव जवैया आखिरी बस जेहा साढ़े आठ छूटथे कब के छूट गे रहिस।
ट्रेन ले उतर के वो हा सोचे लगिस के अब का करंव। फेर मंगल ह अपन पाकिट ले पर्स ल निकाल के देखिस, एक ठन पँचसौहा, दु ठन सौ रुपिया अउ दु ठन बिस्सी मने कुल सात सौ चालीस रुपिया वोमा रहिस। कातिक के महिना सुरु हो गय रहिस अउ थोर-थोर ठंढ परे बर चालू हो गय रहिस।
बिन चद्दर अउ गरम कपड़ा के टेसन म रुकना ओला सही नइ लागिस। अपन पीठ म पिट्ठूल बैग ल लादिस अउ ऑटो स्टेंड म आके पुराना बस स्टेंड जवइया ऑटो म बइठ गय।
जाके लॉज म पता करिस, सबले सस्ता वाला कमरा चार सौ के रहिस। ओला 6-8 घंटा के खातिर 400 रुपिया खरचा करना सही नइ लगिस।
अचानक वोला सुरता आइस, येदे लकठा म लिंक रोड म परताप भइया के बहुत बड़ मकान हवय दुमंजिला। परताप भैया वोला कई पइत बोले घलव रहिस “मंगल भाई बिलासपुर आथच तव एकाक पइत घर आबे न भाई, सीएमडी कॉलेज म लिंक रोड म हवय भाई”
“हव भैया आहंव न एकाक पइत” कहिके मंगल ह ह टाल जावय बात ल।
सुट-सुट रेंगत, अनुमान लगात वोहा घर पहुंच गे। सिरतोन म जब्बर बड़ दुमंजिला मकान रहिस। जब्बर बड़ महराजा गेट रहिस। ओखरे बगल म करिया संगमरमर म बड़े बड़े सोनहा अच्छर म लिखाय रहिस ‘प्रताप शर्मा, अभियंता जल संसाधन विभाग”। मंगल एक दु मिनट ले गेट म “काय करंव काय करंव सोचत खड़े रहिस, फेर ओखर नजर घंटी म परिस, वोला दबाइस। थोरकिन देर बाद दरवाजा खुले के अवाज आइस।
फेर गेट खुलिस, परताप ह मंगल ल उपर ले नीचे तक एक बार देखिस फेर बोलिस “अरे मंगल भाई तंय, अतका रात के, इँहा”
“हां भइया रायपुर ले आवत हंव, ट्रेन लेट म पहुंचिस जेखर सेती जरहगांव वाले आखिरी बस छूट गईस”
“एकाक ठो जीप-वीप मिल जातिच खोजते त, ठीक हे चल भीतरी” मंगल ल महसूस हो गय के अइसना रात-बिरात आना परताप भइया ल अच्छा नइ लगिस।
सामने इंट्रेंस के छोटकन कमरा म दुनो झंन बैठिन।
“भउजी मन सो गे हे का भैया”
“हां भाई, चाय पीबे का?”
“भइगे रहे दे भइया, रहन दे, चाय पिये ले नींद नइ आही, फेर सूबे ले निकलना हे”
“हव, येदे तखत म सोजा, ऊपर म कमरा हवय फेर चल इँहे सोजा, तोला सुबे ले निकलना हे”
मंगल ल जोर के भूख लगत रहिस, भइया ह तो पूछते नइ हे खाय बर, ऐति मोर आटी-पोटा ह जरत हे” मंगल सोचत रहिस। परताप ह अपन कमरा म चल दिस। मंगल ह पानी पिस, अपन बोतल निकाल के फेर उही तखत म सुत गए।
छै बजे नींद खुलगे, मंगल के। परताप आइस अउ एक कप चाय देईस।
“भैया भउजी लइका मन ले मिलवा देते”
“अरे आज इतवार आय मंगल इमन आज आठ नौ बजे ले सुतहीं, तय निकल, तोर बस हे 6:45म”
मंगल जइसेच निकलिस, परताप ह दरवाजा फटाक ले बंद करिस, मंगल ल भीतरी ले अवाज सुनाई दिस” चला गया आपका चचेरा भाई, कहाँ-कहाँ से आ जाते हैं देहाती”
मंगल के नरी म जइसे कुछ अटक गे, दिल ह धक्क ले हो गय, अपमान के कारन आँखि म आँसू आ गइस। वोला अब बड़े मकान ह एकदम छोटकन लागे लगिस।

-महेश पांडेय “मलंग”
पंडरिया (कबीरधाम)
[responsivevoice_button voice=”Hindi Female” buttontext=”ये रचना ला सुनव”]


जनतंत्र ह हो गय जइसे साझी के बइला

मोटा थे नेता, जनता खोइला के खोइला
बिरथा लागथे एला सँवारे के जतन,
जैसे अंधरा ल काजर अँजाई हे।।
करलइ हे भैया करलइ हे।

छोटे -छोटे बात के बड़े- बड़े झगड़ा हे
अपन -अपन गीत अउ अपन -अपन दफड़ा हे
मनखे-मनखे बीच खाई खना गे हे,
भाई के दुश्मन अब होगे भाई हे।।
करलइ हे भैया करलइ हे।

अंधरा प्रसासन अउ भैरा कानून हवय
गरीब के सुनवइयां इँहा भला कउन हवय
सब के सब लुटे बर घात लगाय बैइठे हे
बुड़ मरे घलो म नहकौनी देवइ हे।।
करलइ हे भैया करलइ हे।

महेश पांडेय “मलंग”
पण्डरिया जिला -कबीरधाम
[responsivevoice_button voice=”Hindi Female” buttontext=”ये रचना ला सुनव”]


महेश पांडेय “मलंग” के छत्तीसगढ़ी कविता

बुद्धि ला खूंटी मा टांग के,
भेड़िया असन धँसा जाथन
ढोंगी साधु सन्यासी बर,
फिलगा असन झपा जाथन
कभू आसाराम के झाँसा म
कभू निरमल बाबा के फाँसा म
कभू रामपाल के चक्कर म
कभू राधे माँ म मोहा जाथन
बुद्धि ला खूंटी म टांग के,
भेड़िया असन धँसा जाथन

ढोंगी साधु सन्यासी बर,
फिलगा असन झपा जाथन
खुद मया मोह के चिखला में
नरी उप्पर ले धँसे रहिथे
परवचन कहिथे बड़े बड़े
निनानब्वे के चक्कर म फँसे रहिथे
इन पाखण्डी के चक्कर म,
दूध दोहनी दुनो लुटा जाथन
बुद्धि ला खूंटी म टाँग के,
भेड़िया असन धँसा जाथन
ढोंगी साधु सन्यासी बर,
फिलगा असन झपा जाथन ।।

महेश पांडेय “मलंग”
पंडरिया (कबीरधाम)
[responsivevoice_button voice=”Hindi Female” buttontext=”ये रचना ला सुनव”]