मुख्यमंत्री डॉ. रमन सिंह ह मास्टर ट्रेनर डिजिटल वित्तीय साक्षरता प्रशिक्षण कार्यशाला म जताइन विश्वास के छत्तीसगढ़ देश में रहिही अघुवा
रायपुर, 19 दिसम्बर 2016। कैशलेस लेन-देन खातिर आयोजित डिजिटल वित्तीय साक्षरता कार्यक्रम छत्तीसगढ़ म पाछू 10 दिन म 4 लाख 70 हजार ले जादा मनखे मन ल प्रशिक्षण देहे गए हे। छत्तीसगढ़ इंफोटेक प्रमोशन सोसायटी (चिप्स) के मुख्य कार्यपालन अधिकारी एलेक्स पॉल मेनन ह बताइन के केन्द्र सरकार कोति ले छत्तीसगढ़ के 9734 ग्राम पंचायतों म 3 लाख 89 हजार 360 मनखे मन ल 31 दिसम्बर तक कैशलेस लेन-देन खातिर प्रशिक्षण देहे के लक्ष्य दे गए रहिस हे, जबकि आज 19 दिसम्बर तक 5 लाख 20 हजार ले जादा मनखे ल प्रशिक्षण दे देहे गए हे। मुख्यमंत्री डॉ. रमन सिंह ह ये उपलब्धि खातिर चिप्स के अधिकारी मन अउ कर्मचारी मन ल अउ ये प्रशिक्षण कार्यक्रम म सहयोग देवईया जमो मनखे मन के की सराहना करत उमन ल बधाई दीन।
चिप्स के अधिकारी ह बताईस के ये महीना 9 दिसम्बर 2016 को चिप्स कोति ले मास्टर ट्रेनर डिजिटल वित्तीय साक्षरता प्रशिक्षण कार्यशाला ल सम्बोधित करत मुख्यमंत्री डॉ. रमन सिंह ह विश्वास व्यक्त करे रहिन के डिजिटल वित्तीय साक्षरता कार्यक्रम के अंतर्गत प्रशिक्षण देहे म छत्तीसगढ़ पूरा देस म अगुवा राज्य बनही। डॉ. रमन सिंह कोति ले राज्य ल 10 लाख ले मनखे मन ल प्रशिक्षित करे के लक्ष्य देहे गए रहिस हे। ये लक्ष्य के प्राप्ति खातिर चिप्स कोति ले नियुक्त ग्रामीण लोक सेवक मन के सहायता ले 10 दिन म 4 लाख 70 हजार ले जादा मनखे मन ल प्रशिक्षण दे देहे गए हे।
असल गोठ ये हे के नवा तकनीक ल अपनाये म छत्तीसगढ़ हमेशा आघू रहे हे। प्रधानमंत्री जन-धन योजना जब चालू होए रहिस, तब राज्य के एक करोड़ ले जादा जनता मन के बैंक खाता नइ रहिस हे। छत्तीसगढ़ म शासन अउ जनता के सहयोग ले 90 लाख जनता के जन-धन खाता खोले जा चुके हे। प्रदेश म 96 प्रतिशत लोगन मन के आधार-कार्ड बन गए हे।
केन्द्र सरकार कोति ले देश के जमो राज्य मन ल दिहे गए लक्ष्य के निगरानी खातिर वेबसाईट पोर्टल www.digitaljagriti.in/contents/counters/beneficiaries/state बनाये गए हे। ये वेबसाईट के अनुसार छत्तीसगढ़ ह देश के आन जघा रहईया मनखे के तुलना म सबले जादा मनखे मन ल प्रशिक्षण दे गए हे। छत्तीसगढ़ के पाछू उत्तर प्रदेश म एक लाख 72 हजार ले जादा मनखे ल अउ ओडिसा म एक लाख 55 हजार ले जादा मनखे ल प्रशिक्षण देहे गए हे। ये वेबसाईट ले जिलावार प्रशिक्षण के जानकारी घलव देखे जा सकत हे। खाल्हे म देहे कड़ी ले देश के जमो राज्य मन के प्रशिक्षण के जानकारी लेहे जा सकत हे।
http://www.digitaljagriti.in/contents/counters/beneficiaries/district/CHHATTISGARH~7
http://digitaljagriti.in/state-wise-target.html
