नवा बछर के गाड़ा -गाड़ा बधाई
पाना – डारा के फुलगी म ओकमे झुलना झूलत सीत ल
गोरसी भरे दंदकत डोकरी के आनी-बानी गीत ल
संगी जंवरिहा अउ अलकरहा हीत-मीत ल
सुख़-दुःख म पोटारे रोवईया मया पिरीत ल
… नवा बछर के गाड़ा -गाड़ा बधाई
जंगल के रुख-राई, बेंदरा, भालू , बिघवा ल
चतुरा कोलिहा ल अउ कोटरी निमगा सिधवा ल
फूल के मछेव ल, डारा के मेकरा ल
पानी के मछरी अउ बिला के केकरा ल
… नवा बछर के गाड़ा -गाड़ा बधाई
पानी-बादर, घाम-पियास, म कमावत बनिहार ल
रोजी-रोटी बर निकले तीनचकिया बाले मनिहार ल
नांगर -बईला साजे भिनसार के किसान ल
अउ लइका के पेट बर रोटी बनइया पिसान ल
… नवा बछर के गाड़ा -गाड़ा बधाई
बैरी के गोली झेलइया अइसन परिवार के मुखिया ल
कलपत लईका के महतारी, बिन गोसइया के दुखिया ल
करेजा पथरा करके जियइया ल
जुग भर आँसू के धार पियइया ल
… नवा बछर के गाड़ा -गाड़ा बधाई
लइकन मन के चिहुर अउ बरफ बाले के पोंगा ल
चौका-आरती, करमा- ददरिया, भागवत सुनवइया चोंगा ल
नंदिया म केंवट के जाल अउ डोंगा ल
… नवा बछर के गाड़ा -गाड़ा बधाई
बबा के बनाये कपाट, खुरसी,टेबिल के पटनी ल
गुंगवावत भात संग महतारी के, लासून-मिर्चा के चटनी ल
मेला घूमेन चढ़के अइसन ददा के के खंधइया ल
कोठा म हरही अउ सुरही गईया के बंधइया ल
… नवा बछर के गाड़ा -गाड़ा बधाई
३६ कोटि देबी-देंवता, अन्न-जल, धरा -धाम ल
ठिठुरत मनखे बर अमरित कस एक मूठा घाम ल
बाढ़े-पौढ़े बर अटावत दुःख-पीरा म जिनगानी ल
सरलुगहा बोहावत नंदिया के पानी ल
… नवा बछर के गाड़ा -गाड़ा बधाई
मोर मयारू देवसीर दाई के लाठी ल
तइहा के सुरता म गठियाये भौंरा-बांटी ल
सुमत के संदेसिया नान-नान चांटी ल
जिनगी के जीत म, माथा तिलक बर माटी ल
… नवा बछर के गाड़ा -गाड़ा बधाई
चन्दा के सँवांगा, लोरिक के खुमरी ल
तिंवरा, कांदा, खेढ़ा, चेंच अउ चना के घुंघरी ल
चीला, फरा, बरा, भजिया अउ सोंहारी ठेठरी ल
बधाई देवत ले पुरगे अइसन मोर मोबाईल के बेटरी ल
… नवा बछर के गाड़ा -गाड़ा बधाई
ए गुरतुर गोठ के पढ़हईया जम्मो संगवारी, लेखक, कवि मन ल
बीमरहा लोकतंत्र / संस्कृति के ‘साहित्यिक दवई’ मन ल
… नवा बछर के गाड़ा -गाड़ा बधाई।
प्रमोद बघेल , बिलासपुर (छ. ग.)
08358982973
satellite3210@gmail.com
