- प्रदेश के 9 भ्रष्ट अफसर के 15 ठिकाना मन म एसीबी हर मारिस छापा
- उद्योग विभाग के अविनाश गुंजाल के घर मिलीस सोन के सिल्ली
- छापेमारी मं मिलीस अड़बड़ नकदी, अपार संपत्ति
रायपुर 16 फरवरी 2017। आज भिनसरहा ले ACB ह कई जघा छापा मार के अंदाजन 10 करोड़ के संपत्ति के पता लगाईस। छापा म कोनो जघा सोन के सिल्ली मिलिस त कोनो जघा स्विमिंग पुल, सोन-चांदी के संगे-संग लाखों रुपया नकद घलोक मिले हावे। एसीबी आज भिनसरहा करीबन 5 बजे ले 9 भ्रष्ट अफसर मन के अलग-अलग ठिकाना मन म छापेमारी के कार्रवाई करत हे।
समाज कल्याण विभाग के एडिशनल डायरेक्टर एमएल पांडे के सुंदरनगर रायपुर के बंगला के संगे-संग फारेस्ट के एसडीओ रामेश्वर प्रसाद वर्मा के कोरिया अऊ रायपुर के बंगला म घलोक कार्रवाई चालत हावे। कृषि विभाग के शालिकराम वर्मा, श्रवण सिंह कॉपरेटिव सोसाइटी जांजगीर चांपा, एके तंबोली सहायक खाद्य अधिकारी बिलासपुर, डॉ पुनीत सेठ भिलाई(सूर्या विहार), सुभाष गंजीर दंतेवाड़ा जिला शिक्षा अधिकारी, अविनाश गुंजाल उद्योग विभाग बिलासपुर के घर म घलोक एसीबी के टीम के छापेमारी जारी हावे। जानकारी के मुताबिक करीब 150 ले जादा अधिकारी-कर्मचारी छापेमारी मं लगे हें। इंखर संग देहे खातिर सौ ले आगर पुलिस मन घलव लगे हें। पता चले हे के पंद्रा ले आगर ठिकाना मन म छापेमारी के कार्रवाई चलत हावे जेन बस्तर, कोरिया, बिलासपुर, जांजगीर चांपा, दुर्ग, कोरबा अऊ रायपुर मं हे। एसीबी के ए कार्रवाई म दस डीएसपी अउ पचीस टीआई संघरे हें। उद्योग विभाग के अस्टिटेंट डायरेक्टर अविनाश गुंजाल तीर ले सोन के सिल्ली मिले के खबर मिले हे उन्हें दंतेवाड़ा जिला शिक्षा अधिकारी तीर आठ लाख ले आगर नकद अऊ सोन के अड़बड़ अकन गहना मिले हावे। एसीबी ल गहना ल तउले बर मशीन मंगाए हे।
