अपन किसान के मंय किसानिन अंव।
बड़े फजर पनिहारिन अंव।
बोली में सुध्धर बानी अंव
घर घर के खपरा छान्ही अंव
भारत भुइयां के माटी अंव
मंय छत्तीसगढ़ के बेटी अंव
मंय दुलौरिन बेटी दाई के
मंय राखी अंव गा भाई के
मंय पहुना अंव भउजाई के
अऊ परोसिन बर पहुनाई के
मंय दुखिया के मिलोती अंव।
मंय छत्तीसगढ़ के बेटी अंव
मंय गंगा अंव मंय गीता अंव
मंय रामचंन्द के सीता अंव
अपन पति के मंय परनीता अंव
छत्तीसगढ़हिन नंय सुरजोती अंव।
मंय छत्तीसगढ़ के बेटी अंव
मंय पूजा करथंव गरूवा के
तीजा में गनपति मुसवा के
देवारी मा गौरी गौरा के
अंगना मा तुलसी चंवरा के
ऊही चंवरा के मंय तुलसी अंव।
मंय छत्तीसगढ़ के बेटी अंव।
मंय बूता करथंव जांगर टोर
मंय लुगरा पहिरवं पटनी मोर
मंय मंया पिरित बांधव डोर
मंय नइ जानंव गा तोर मोर
मंय सब बर मंया पिरवती अंव।
मंय छत्तीसगढ़ के बेटी अंव।
मंय धान गहूं ला उपजाथंव
अऊ चना राहेर ला बोवाथंव
छेरछेरा पुन्नी में बंटाथंव
मंय धान कटोरा खेती अंव।
मंय छत्तीसगढ़ के बेटी अंव
अरपा पइरी के पानी अंव
खेती माटी के जिनगानी अंव
मंय धान गहूं के निसानी अंव
मंय महानदी के रेती अंव।
मंय छत्तीसगढ़ के बेटी अंव।
घट घट मोर देंवता धामी हे
राजिम लोचन कुलेसर स्वामी हे
जतमई अऊ घटारानी हे
घर घर महामाया रानी हे
उंकर चरन के मंय पुजारिन अंव।
मंय छत्तीसगढ़ के बेटी अंव।
मंय दूनों कुल के जोती अंव।
मंय छत्तीसगढ़ के………
बेटी अंव।
केंवरा यदु..मीरा.
[responsivevoice_button voice=”Hindi Female” buttontext=”ये रचना ला सुनव”]