पढ़ई लिखई में ठिकाना नइहे
गली में मटमटावत हे
हार्न ल बजा बजा के
फटफटी ल कुदावत हे।
घेरी बेरी दरपन देख के
चुंदी ल संवारत हे
आनी बानी के किरीम लगा के
चेहरा ल चमकावत हे।
सूट बूट पहिन के निकले
चसमा ल लगावत हे
मुंहू में गुटका दबाके
सिगरेट के धुंवा उड़ावत हे।
मोबाइल ल कान में लगाके
फुसुर फुसुर गोठियावत हे
फेसबुक अऊ वाटसप चलाके
मने मन मुस्कावत हे।
संगी साथी संग घूम घूमके
आदत ल बिगाड़त हे
फोकट म खाय ल मिलत त
बाप के कमई ल उड़ावत हे |
लाज शरम तो बेचा गेहे
कनिहा ल मटकावत हे
नाक ह तो पहिली ले कटा गेहे
अब कान ल छेदावत हे |
महेन्द्र देवांगन “माटी”
गोपीबंद पारा पंडरिया
जिला-कवर्धा (छ.ग)
मो. 8602407353