रायपुर, मुख्यमंत्री डॉ. रमन सिंह ह आज तहसील मुख्यालय पलारी मं आयोजित अंत्योदय विकास अऊ आवास मेले मं समाज कल्याण विभाग के योजना मन के तहत अंदाजन 1200 दिव्यांगजन मन ल 76 करोड़ 29 लाख रूपया के सहायक उपकरण मन के वितरण करिस। एमां मोटराइज्ड तिपहिया साईकिल, व्हीलचेयर, श्रवण यंत्र, ट्राईसाईकिल, बैशाखी, नेत्रहीन मन बर श्वेत छड़ी आदि सामिल रहिस। मुख्यमंत्री ह दिव्यांगजन मन ल आशीर्वाद प्रदान करिस। कार्यक्रम मं विधानसभा अध्यक्ष श्री गौरीशंकर अग्रवाल, खाद्य मंत्री श्री पुन्नूलाल मोहले, जांजगीर के लोकसभा सांसद श्रीमती कमला देवी पाटले, भाटापारा के विधायक श्री शिवरतन शर्मा, बलौदाबाजार के विधायक श्री जनकराम वर्मा, बिलाईगढ़ के विधायक डॉ. सनम जांगड़े, बलौदाबाजार-भाटापारा जिला पंचायत अध्यक्ष श्रीमती पूनम मारकण्डेय संग बहुत अकन जनप्रतिनिधि घलोक उपस्थित रहिन। विधानसभा अध्यक्ष श्री गौरीशंकर अग्रवाल ह ए अवसर म कहिन कि मुख्यमंत्री डॉ. रमन सिंह ह बलौदाबाजार-भाटापारा ल साल 2012 मं जिला के दर्जा दिलाइन। एखर ले क्षेत्र के विकास मं तेजी आईस। खाद्य मंत्री श्री पुन्नूलाल मोहले ह डॉ. रमन सिंह के सरकार के विकास कार्य ल अपन कविता के माध्यम ले अभिव्यक्त करिस। कलेक्टर डॉ. बसवराजु एस हर प्रतिवेदन मं जिला के विकास कार्य के जानकारी दीन। उल्लेखनीय हावे कि मुख्यमंत्री डॉ. रमन सिंह हर ए अवसर म जिला के विकास बर अंदाजन 175 करोड़ रूपए के निर्माण कार्य के लोकार्पण, भूमिपूजन अऊ शिलान्यास करिस।
