Categories
छंद सार

कस्तूरी – छत्तीसगढ़ के हरियर चाँउर

छत्तीसगढ़ के हरियर चाँउर, होथे सबले बढ़िया
एखर बारे मा नइ जाने, सब्बो छत्तीसगढ़िया ।।

दुरुग अउर धमतरी जिला मा, एखर खेती होथे
फेर अभी कमती किसान मन, एखर बीजा बोथे।।

सन् इकहत्तर मा खोजिन अउ नाम रखिन कस्तूरी
छत्तीसगढ़ महतारी के ये, हावय हरियर चूरी।।

वैज्ञानिक मन शोध करत हें, कइसे बाढ़े खेती
कस्तूरी के फसल दिखय बस, जेती जाबो तेती।।

हर किसान ला मिलै फायदा, ज्यादा मनखे खावँय
छत्तीसगढ़ के कस्तूरी के, गुन दुनिया मा गावँय।।

ग्लुटेन एमा नइ चिटिको, रखे वजन साधारण
कैंसर के प्रतिरोधक क्षमता, क्लोरोफिल के कारण।।

फाईबर प्रोटीन सुनव जी, ये चाँउर मा भारी
जेखर कारण नइ हो पावय, लीवर के बीमारी।।

धान कटोरा छत्तीसगढ़ के, चाँउर सबले बढ़िया
कस्तूरी चाँउर के मालिक, जग मा छत्तीसगढ़िया।।

अरुण कुमार निगम
आदित्य नगर, दुर्ग
छत्तीसगढ़



1 reply on “कस्तूरी – छत्तीसगढ़ के हरियर चाँउर”

Leave a Reply

Your email address will not be published. Required fields are marked *