मुख्यमंत्री डॉ. रमन सिंह के अध्यक्षता म समीक्षा बैठक
रायपुर 4 जनवरी 2017। मुख्यमंत्री डॉ. रमन सिंह ह आज बिहनिया इहां अपन घर के कार्यालय म आयोजित बैठक म प्रधानमंत्री उज्ज्वला योजना के समीक्षा करिस। खाद्य विभाग के अधिकारी मन बैठक म बताताईन के ये योजना के शुरू होए के करीब साढ़े चार महीना के भीतर राज्य म लगभग छह लाख 40 हजार गरीब परिवार मन ल महिला मन के नाम म निःशुल्क रसोई गैस कनेक्शन देहे गए हे। उमन ल डबल बर्नर चूल्हा अउ पहिली सिलेण्डर निःशुल्क देहे गए हे। छत्तीसगढ़ म प्रधानमंत्री नरेन्द्र मोदी के सर्वोच्च प्राथमिकता वाले ये योजना के तहत दू बछर म 25 लाख गरीब परिवार ल सिरिफ 200 रूपए के पंजीयन शुल्क म मुफ्त रसोई गैस कनेक्शन देहे के लक्ष्य हावय। योजना के शुभारंभ 13 अगस्त को राजधानी रायपुर म मुख्यमंत्री के अध्यक्षता म आयोजित समारोह म केन्द्रीय पेट्रोलियम राज्यमंत्री धर्मेन्द्र प्रधान हर करे रहिस। मुख्यमंत्री ह आज के समीक्षा बैठक म अधिकारी मन ल रसोई गैस कनेक्शन लउहे बांटें के निर्देश दिस। डॉ. सिंह ह कहिस के चालू वित्तीय वर्ष म दस लाख कनेक्शन के वितरण के लक्ष्य हावय। एकर विरूद्ध आयल कंपनिय मन ल 10 लाख 53 हजार आवेदन मिले हे। उमन निर्धारित लक्ष्य के अनुसार मार्च तक दस लाख कनेक्शन के वितरण सुनिश्चित करे के निर्देश दीन।
डॉ. सिंह ह कहिन के रसोई गैस सिलेंडर मन के बॉटलिंग क्षमता बढ़ाए अउ प्रदेश के दुर्गम क्षेत्र मन म रसोई गैस वितरक मन के नियुक्ति के प्रक्रिया म घलव तेजी लाए के जरूरत हवय। बस्तर अउ सरगुजा संभाग सहित आन संभाग मन के दुर्गम क्षेत्र मन म कृषि उपज मंडी समिती मन, सहकारी समिती मन अउ महिला स्व-सहायता समूह मन ल घलव वितरक बनाये जाए। बैठक म अधिकारी मन बताइन के राज्य के दुर्गम क्षेत्र मन म ले सरगुजा संभाग के सात जिला मन म 15 वितरक, सरगुजा संभाग के पांच जिला मन म 14, बिलासपुर संभाग के दो जिला म 9, दुर्ग संभाग के दो जिला म 6 अउ रायपुर संभाग के 3 जिला म 6 नवा रसोई वितरक बनाए जाही। मुख्यमंत्री ह एकर खातिर जमो जरुरी प्रक्रिया ल पूरा करे अउ अप्रैल तक 50 नवा वितरक मन के नियुक्ति सुनिश्चित करे के घलव निर्देश दीस।
खाद्य अधिकारी मन बैठक म बताइन के रायपुर के तिल्दा म भारत पेट्रालियम कंपनी के नवा बाटलिंग प्लांट इही साल सितंबर महीना तक काम करे लगही। एकर संगें-संग कोरबा जिला के गोपालपुर म इंडियन आयल कंपनी अउ हिन्दुस्तान पेट्रालियम कंपनी के नवा बाटलिंग प्लांट जांजगीर म लगाए के कार्रवाई प्रगति म हे। अभी सिलतरा, मंदिर हसौद, रसमड़ा अउ भिटौली म चार बॉटलिंग प्लांट काम करत हे। जेकर हर महीना कुल बाटलिंग क्षमता पंद्रह लाख गैस सिलेंडर के हे। जेला जरुरत के मुताबिक बढ़ाए जा सकत हे। अभी मांग के अनुसार सिलेंडर मन के पर्याप्त आपूर्ति करे जावत हे।
बैठक म इहू बताए गीस के प्रधानमंत्री उज्ज्वला योजना लागू होए के बाद कइ आयल कंपनी मन कोति ले अगस्त महीना म 28 हजार, 380, सितंबर महीना म 83 हजार 775, अक्टूबर महीना म एक लाख 14 हजार 461, माह नवंबर महीना म एक लाख 26 हजार 251 अउ दिसंबर महीना म एक लाख 87 हजार 313 रसोई गैस बांटे गइस। बैठक म मुख्य सचिव विवेक ढांड, छत्तीसगढ़ पर्यावरण संरक्षण मंडल के अध्यक्ष अमन कुमार सिंह, मुख्यमंत्री के सचिव सुबोध कुमार, स्कूल शिक्षा विभाग के सचिव विकासशील, सहकारिता के सचिव डी.डी. सिंह, संचालक जनसंपर्क राजेश सुकुमार टोप्पो, संस्थागत वित्त के संचालक डॉ. कमलप्रीत सिंह, खाद्य विभाग के विशेष सचिव मनोज सोनी, खाद्य विभाग के संचालक नीलम एक्का, अउ उप सचिव शिवानंद तायल संग आयल कंपनी मन के अधिकारी उपस्थित रहिन।
