Category: गज़ल

इही ल कहिथे मितानी संगी बनथे जउन ह  छानी  संगी। दुख के घड़ी म आँसू पोंछय ओकर गजब कहानी  संगी। अनीत-रद्दा म जब हम रेंगन कहिथे करु-करु बानी  संगी। झन राहय टुटहा कुरिया  फेर राहय गजब सुभिमानी  संगी। जिनगी म कतको बिपत आये करय  झन  ओ  नदानी  संगी। बलदाऊ राम साहू  9407650458

जउन  हर  सत्ता  धारी  हे। उही  मन  तो   बैपारी   हे। जिनकर डमरु बजात हावै, सही  मा  ओ  ह  मदारी हे। बिरथा  बात  मुँहू  म आथे, उही  ला  कहिथे  गारी  हे। जउन   हर  पी  माते  हावै उनकर घर  म  कलारी  हे। दुरपती ला सरबस  हारिन, उही मन सच म  जुवारी हे। कलारी=शराब की दुकान –बलदाऊ राम साहू

कइसे मा दिन बढ़िया आही। कइसे   रतिहा  अब  पहाही। गाए बर  ओला  आय  नहीं, कइसे ओ हर ताल मिलाही। बिन सोचे काम जउन हर करही, ओ हर पाछू  बड़  पछताही। अब तो  मनखे  रक्सा  बनगे, मनखे के जस कौन ह  गाही। साधु के संग जउन हर करही, ओ मनखे हर सरग म  जाही। पखरा पूजे  म  क  होवत  हे, मन पूजौ जिनगी  तर  जाही। ‘बरस’ बात ला सुन  लाबे  तैं, आज नहीं तब  काली  जाही। रतिहा =रात, पखरा पत्थर, काली=कल। –बलदाऊ राम साहू

झन फँसबे माया के जाल, सब  के  हावै  एके  हाल। कतको   तैं   पुन   कमाले, एक दिन अही तोरो काल। कौनो   इहाँ  नइ  बाँचे  हे, बड़का हावै जम के गाल। धन-दौलत  पूछत हे कौन, जाना हे  बन  के  कंगाल। कौन देखे  हे  सरग-नरक, पूछौ तुम मन नवा सवाल। अंत समे मा पूछ  ही कौन, कतका हावै तोर कर माल। ‘बरस‘ कहत हे सोझ-सोझ, नइ  हे तुँहर  कौनो  लेवाल। जम=यम,कतका=कितना, लेवाल=खरीददार, सोझ-सोझ=सीधा-सीधा, तँहर=तुम्हारे। –बलदाऊ राम साहू