रायपुर 25 दिसंबर 2016। छत्तीसगढ़ के मुख्यमंत्री डॉ. रमन सिंह ह राज्य सरकार के कर्मचारी मन ल सातवां वेतनमान देहे के घोषणा करे हें। उमन कहिन के राज्य शासन के स्तर म येकर खातिर उदीम करे जात हे। जमो जरूरी औपचारिकता मन ल लउहे करके सातवां वेतनमान देहे जाही। मुख्यमंत्री ह कहिस के राज्य सरकार अपन कर्मचारी मन ल केन्द्र के अनुरूप सातवां वेतनमान देहे बर सहमत हे। डॉ. सिंह आज मझनिया अपन घर के कार्यालय म छत्तीसगढ़ अधिकारी-कर्मचारी फेडरेशन के प्रतिनिधि मंडल ले गोठ बात करिन। ये अवसर म मुख्यमंत्री ह तुरते मुख्य सचिव ल फोन लगाइन अउ कहिन के फेडरेशन के प्रतिनिधि मंडल ल अलग ले बुला के कर्मचारी हित ले जुरे उंखर जमो मुद्द मन उपर विस्तार ले चर्चा करयं।
मुख्यमंत्री ल आज फेडरेशन के संयोजक सुभाष मिश्रा अउ राज्य कर्मचारी संघ के पूर्व अध्यक्ष वीरेन्द्र नामदेव के सियानी म प्रतिनिधि मंडल ह अलग-अलग ज्ञापन सौंपिन अउ ये मुद्द मन कोति मुख्यमंत्री के ध्यान आकर्षित करिन। फेडरेशन के एक ज्ञापन म राज्य म छठवां वेतनमान पावत सरकारी कर्मचारी अउ पेंशनर मन ल केन्द्र के समान एक जुलाई 2016 ले महंगाई भत्ता सात प्रतिशत अतिरिक्त किश्त लउहे देवाए के घलव आग्रह करे गए हे। फेडरेशन के प्रतिनिधि मन मुख्यमंत्री ल बताइन के केन्द्र सरकार ह अपन विभाग, सार्वजनिक उपक्रम अउ स्वायत निकाय म काम करत अउ छठवांं वेतनमान पावत कर्मचारी मन खातिर एक जुलाई 2016 ले महंगाई भत्ता के अतिरिक्त किश्त पहली ही घोषित कर देहे हे।
फेडरेशन के एक ठन आन ज्ञापन म मुख्यमंत्री ले चार स्तरीय पदोन्नत वेतनमान देहे, प्रदेश म सातवांं वेतनमान ल यथाशीघ्र लागू करे, कर्मचारी संगठन मन के मान्यता ल जा के तस रखेे, अधिकारी अउ कर्मचारी के वेतन विसंगति ल तत्काल दूर करे, केन्द्र अउ मध्यप्रदेश जइसे महिला कर्मचारी मन ल प्रसूति अवकाश स्वीकृत करे, लघुवेतन अउ शिक्षक संवर्ग के सेवानिवृत्त आयु अन्य सवंर्ग के आयु ल दू बछर बढ़ाए, प्रशासनिक सुधार आयोग ल सौंपे गे ज्ञापन मन उपर यथाशीघ्र कार्रवाई करे अउ कर्मचारी संघ के पदाधिकारी मन ल मंत्रालय आए-जाये खातिर प्रवेश पत्र के स्थायी व्यवस्था करे संग आन मांग शामिल हे।
ज्ञापन म मुख्यमंत्री ले यहू अनुरोध करे गए हे के नया रायपुर म सरकारी कर्मचारी मन ल उही शर्त अउ रियायत मन उपर नया रायपुर म आवासीय भू-खंड देहे जाए, जेन शर्त अउ रियायत म धरमपुरा म वरिष्ठ अधिकारी मन ल देहे गए हे। मुख्यमंत्री ले मुलाकात बर आए फेडरेशन के प्रतिनिधि मंडल म प्रदेश तृतीय वर्ग शासकीय कर्मचारी संघ के प्रांताध्यक्ष पी.आर.यादव, डिप्लोमा इंजीनियर एसोसिएशन के प्रदेश अध्यक्ष सुरेन्द्र टूटेजा, लिपिक वर्गीय कर्मचारी संघ के कार्यकारी प्रांताध्यक्ष संजय सिंह अउ छत्तीसगढ़ शिक्षक संघ के महामंत्री यशवंत वर्मा संग कई कर्मचारी संगठन के प्रतिनिधि संघरे रहिन। जमो कर्मचारी नेता मन मुख्यमंत्री ल उंखर नेतृत्व म प्रदेश सरकार के तेरा बछर पूरा होए अउ चौउदहवां बछर म सुरूू होए के बधाई दीन। प्रतिनिधि मंडल ह डॉ. सिंह ल उंखर सफल अमेरिका यात्रा अउ आज मनाए गए सुशासन दिवस के घलव बधाई दीन।
