मुख्यमंत्री ह करिन रवि भवन अउ मालवीय रोड के बाजार मन म कैशलेस सुविधा के लोकार्पण
डॉ. रमन सिंह ह दुकान म खड़े होके बिसाईस मनपसंद जिनीस मोबाईल कव्हर, पेन अउ खारा बिसा के करिस कैशलेस भुगतान
रायपुर, 19 दिसम्बर 2016। मुख्यमंत्री डॉ. रमन सिंह आज मंझनिया राजधानी रायपुर के सबले भीड़-भाड़ वाले मालवीय रोड बाजार पहुंचिस। उहां उमन दुकान मन म खुद कैशलेस भुगतान करके खरीददारी करिस। डॉ. सिंह ह जयस्तंभ चौक के रविभवन ‘स्मार्ट बाजार-स्मार्ट रायपुर’ के लोकार्पण करिन। अब रवि भवन अउ मालवीय रोड के बाजार देश के पहिली कैशलेस बाजार बन गे हे।
रवि भवन म 530 दुकानों अउ मालवीय रोड, ओकर ले जुड़े 382 दुकान मन म पीओएस, यूपीआई एप अउ पेटीएम सहित आन डिजिटल माध्यम मन ले ग्राहक मन ल कैशलेस भुगतान के सुविधा उपलब्ध कराये गए हे। मुख्यमंत्री के रवि भवन पहुंचे म व्यापारी मन उंकर स्वागत करिन। मुख्यमंत्री ह रवि भवन के एक दुकान ले अपन आई फोन मोबाइल खातिर मनपसन्द रंग के कव्हर बिसाईस। मालवीय रोड के एक इलेक्ट्रानिक दुकान ले उमन एक पेन अउ एक खारा के दुकान ले दू पैकिट खारा बिसाईस। मुख्यमंत्री ह कैशलेस व्यवस्था ले जुड़े खातिर व्यापारी मन ल धन्यवाद दीस। उमन कहिन के आज कई बछर बाद मोला दुकान म ठाढ़ होके मनपसन्द समान बिसाये के मौका मिलिस।
डॉ. सिंह ह ये अवसर म नगर निगम रायपुर कोति ले बनाये मोबाइल एप ‘मोर रायपुर’ के लोकार्पण घलव करिन। ये एप के जरिए सम्मत्ति कर भुगतान सहित नगर निगम के कई ठन सेवा मन के जानकारी मिलही। संगें संग निगम के किराया म मिलईया सम्पत्ति जईसे शहीद स्मारक अउ इंडोर स्टेडियम के ऑनलाईन बुकिंग घलव येकर ले करे जा सकत हे। मुख्यमंत्री ह ये अवसर म आठ झिन ल डिजिटल आर्मी एम्बेसडर के सर्टिफिकेट प्रदान करिन। ये दूत मन मनखे मन ल कैशलेस भुगतान के संबंध म जानकारी देके ये प्रणाली ल अपनाये खातिर प्रोत्साहित करहीं। मुख्यमंत्री ह मालवीय रोड म पैदल घूम के मनखे मन ल कैशलेस भुगतान बर प्रेरित करिन। उमन कहिन के डिजिटल पद्धति ले कैशलेस भुगतान बहुत आसान हावय। येकर ले लोगन मन ल नगदी लेके चले के जरूरत नइ परही। रवि भवन अउ मालवीय रोड ले लगे गोल बाजार के 509 दुकानों म लगभग 70 प्रतिशत दुकान मन म कैशलेस भुगतान के सुविधा उपलब्ध करा देहे गए हे। लउहे गोलबाजार घलव कैशलेस बाजार हो जाही।
ये अवसर म रायपुर ग्रामीण के विधायक श्रीचंद सुन्दरानी, नगर निगम रायपुर के सभापति प्रफुल्ल विश्वकर्मा, राज्य अल्पसंख्यक आयोग के पूर्व अध्यक्ष दिलीप सिंह होरा, चेम्बर ऑफ कॉमर्स रायपुर के अध्यक्ष अमर पारवानी, नगर निगम के पार्षद, अउ व्यापारी संघ के पदाधिकारी, मुख्यमंत्री के संयुक्त सचिव रजत कुमार, कलेक्टर रायपुर ओ.पी. चौधरी, नगर निगम रायपुर के आयुक्त रजत बंसल सहित अड़बड़ झान नागरिक उपस्थित रहिन।
