मुख्यमंत्री श्री विष्णु देव साय सीआईआई कोति ले आयोजित ग्रीन स्टील समिट 2024 म होइन सामिल
रायपुर, 25 जुलाई, 2024। क्लाइमेट चेंज के चुनौती ले निपटने बर पूरा दुनिया ग्रीन स्टील कोति आगू बढ़त हे। स्टील के उत्पादन म अग्रणी राज्य मन म ले एक होए के नाते ग्रीन स्टील छत्तीसगढ़ बर घलोक बड़ संभावना लेके आए हे। एखर से न केवल कार्बन उत्सर्जन के लक्ष्य ल प्राप्त करे म हमला मदद मिलही, भलुक ए क्षेत्र म नवा पहल करके हम बड़का आर्थिक उपलब्धि के संभावना मन के दरवाजा खोल सकत हन। ये बात मुख्यमंत्री श्री विष्णु देव साय ह नवा रायपुर अटल नगर स्थित मेफेयर लेक रिसार्ट म आयोजित ग्रीन स्टील समिट 2024 म सामिल होए के अवसर म कहीन। ए समिट के आयोजन भारतीय इस्पात उद्योग ल कार्बन रहित बनाए के उद्देश्य ले करे गए हे। समिट म देश भर के प्रमुख उद्योगपति, व्यापारी उपस्थित रहिन।
ए अवसर म मुख्यमंत्री श्री विष्णु देव साय ह अपन संबोधन म सीआईआई ल आयोजन बर बधाई देवत कहिन कि छत्तीसगढ़ प्रदेश भारत के सबले प्रमुख स्टील बनइया हे। हमार इहां सार्वजनिक क्षेत्र के भिलाई स्टील प्लांट अऊ नगरनार स्टील प्लांट जइसे बड़े इकाई तो संचालित हे ही, एखर संगें-संग निजी क्षेत्र के बहुत अकन छोटे-बड़े इस्पात संयंत्र संचालित हे।
मुख्यमंत्री ह कहिन कि भिलाई इस्पात संयंत्र एशिया के सबले बड़े स्टील प्लांट हे अऊ छत्तीसगढ़ म लोहा के विशाल भंडार हे, जेमें बैलाडीला, रावघाट अऊ दल्लीराजहरा प्रमुख हे। छत्तीसगढ़ के देश म कुल उत्पादित स्टील म लगभग 20 प्रतिशत तक के योगदान हे अऊ राज्य के अर्थव्यवस्था म उद्योग मन के भागीदारी 53.50 प्रतिशत हे।
मुख्यमंत्री ह इस्पात उद्योग ले उत्पन्न होवइया प्रदूषण के वैश्विक चिंता उपर घलोक प्रकाश डालिन अऊ कहिन के हमार यशस्वी प्रधानमंत्री श्री नरेन्द्र मोदी जी ह साल 2070 तक शून्य कार्बन उत्सर्जन के लक्ष्य ल हासिल करे के दृष्टिकोण सामने रखे हे। उमन केंद्रीय नवीन अऊ नवीकरणीय ऊर्जा मंत्रालय कोति ले राष्ट्रीय हरित हाइड्रोजन मिशन के घोषणा के सराहना करिन अऊ राज्य म सौर ऊर्जा अऊ हरित ऊर्जा के उपयोग ल बढ़ावा देहे के प्रयास मन के उल्लेख करिन।
