हमर देस मा तुंह जिहां भी कोनो सार्वजनिक जगह, सरकारी जगह मा जाहा तव उहां के भिथियां म कुछु न कुछु बोर्ड मा लिखाय सूचना पाहा। जइसे के “जइसन किसिम-किसिम के सूचना भिथिया म टंगाय रहिथे। फेर हमर देस के मनखे मन के कुछु आने च काम चलथे। इहां मनखे मन जिहां लिखाय देखहिं के “इहां थूकना मना हावय” के बोर्ड ल देखके मनखे के मन मा थूंके के इक्छा कुलबुलाय लगथे अउ तुरते उन पच्च के दे थे। तहां ले उहां ले तुरते निकले लेथे के कोनो देखय झन। हमर सरकार अउ अधिकारी मन ए समस्या के हल निकालत-निकालत थकगे। फेर लोगन मन के पच्च ले देहे के आदत नइ गइस। ए आदत ल छोराय खातिर कइ झिन अधिकारी मन अपन आपिस के भिथिया अउ कोंटा म जम्मो किसिम किसिम के संदेश लिखिवा देथें, फेर वाह रे थूंकइया मन के थूंकाइ जिहां सुघ्घर भिथिया पावत हे तहां ले भइगे पच्च के दे देंथे।
थूंकइया मन ल रोके खातिर तव सरकार ल बिदेस कस दांड भरवा लेना चाहि। थूंकइया दांड ले सरकार के खजाना घलो भर जाहि। अउ एक ठिन उदीम करना चाहि के सूचना बोर्ड म इहां थूकना मना हावय लिखवाय के जगा म इहें थूकना हावय लिखवा के टंगवाना चाहि। काहे के मनखे मन ल जेन काज करे बर कहिया तेन कारज ल नइ करय अउ ओखर उलटा कारज करथें।
मोला त लगथे के हमर आदत कस परगे हे जेन कारज ल करना हे तेला छोरके ओखर उल्टा कारज करना। तुंहू मनन देखत होहा के पारा मोहल्ला मा जिंहा कचरादानी रखाय रहिथे अउ ओमा लिखाय घलव रहिथे के “अेमा कचरा मेंलव” तव देखिहा के कचरादानी सफ्फा रखाय रइ जथे अउ ओखर अगल-बगल म कचरा कुढ़ाय रहिथे। कचरा मेंलइया मन घलव थूंकइया मन ले कम नइ हे इहू मन जिहां सफ्फा जगा देखथें उहें कचरा ल मेल देथे। आजकाल तव जबले पन्नी आयहे कचरा मेंलइया मन ल बने सुभिता होगे हे। जम्मो कचरा ल पन्नी भितरी डाला अउ बने गठियां के दू पइत घुमार के सांय नइ करयं के ए पन्नी ल कोनो गाय गरुवा मन खांवय के कचरा बगरय। बड़का गाड़ी वाले मन घलो अपन घर के कचरा ल जेमा मरे मुसुवा, टूटहा करसी, पन्नी, खरहरा, बहरी अउ कोला बारी के जम्मो कचरा ल पन्नी म भरके लानथें अउ कोंटा-कांटी म उलअ के पल्ला हो जथे। अइसनहे ” इहां गाड़ी रखना मना हावय” जिहां लिखाय रहिथें उहिच तीरन जम्मो मनखे मन के गाड़ी ठड़ियाए रहिथे। इंखर एकेच उपाय हावय के उहां ” इहेंच गाड़ी रखना हावय” के बोर्ड लगा देना चाहि।
विवेक तिवारी
बिलासपुर