नवा रइपुर मोर रइपुर

हर छत्तीसगढ़ वासी ल अपन प्रदेस उपर गरब करना चाही। काबर के ये प्रदेस ह वोला अइसन गरब करे के भरपूर मउका देथे। ये ह प्रदेस के सांस्कृतिक बल आय जउन वोला अपन मन के बुता करे के अपन मन के बात केहे-बोले अउ लिखे के आजादी देथे। ये सांस्कृतिक ताकत ल हमर प्रदेस के महापुरुस मन हमेसा बढ़ईन। आजो ये काम होवत हे। हमन आज के महापुरुस ल पहिचाने म भले गलती करथन या चिन नइ सकन। ये ह कुछ सुवार्थी मन के चाल आय के उन सुवारथ के धुंधरा ल बढ़ा के सुरुज ल तोपना चाहथे। फेर धुंधरा कभू इस्थाई नइ होवय, वो ह छंटाजाथे। सुरुज ल तोपे के परयास कभू सफल नइ होय।

हमर राज्य ल अस्तित्व म आय बारा बछर हो गे। छे म छट्ठी होथे अउ बारा म बरही। ये अइसन सुघ्धर संजोग आय के छत्तीसगढ़ के बरही म ‘नवा रइपुर‘ अस्तित्व म आगे। ये जम्मों प्रदेसवासी बर सिरतोन बड़ खुसी के बात आय। अब ये मउका आगे हे के राजधानी के नांव ल छत्तीसगढ़ी भासा अउ छत्तीसगढ़िया मन के भावना के अनुरूप रखे जाय जेमा छत्तीसगढ़ियापन झलके। एखर बर राजधानी के नाव ‘नवा रइपुर’ रखे जाना चाही। काबर के छत्तीसगढ़ राज छत्तीसगढ़ी भासा बोलइया मन के क्षेत्र के अधार म बनाय गे हे। हमर मयारू सरकार ह छत्तीसगढ़ी ल प्रदेस के राजभासा बनाय के घोसना कर चुके हे। छत्तीसगढ़ी राजभासा आयोग घलो गठित हो गे हे। छत्तीसगढ़ के जम्मो बड़का साहित्यकार मन अपन छत्तीसगढ़ी रचना म रइपुर के उल्लेख करे हवंय। कोनो कवि के रचना हे जेमा आजादी के पहिली गांधी जी के आह्वान म भारत छोड़ो आंदोलन अउ असहयोग आंदोलन म भाग लेवइया मन रइपुर के जेल म बंद रिहिन तेखर बरनन हवय-

‘‘अरे ‘रइपुर’ के जेल अलबेला रे
जिहां जुरिन गांधी के चेला रे।।‘‘

एक ठी नवा चलागन चले हे के क्षेत्रीय भासा के बात करई ल अलगाववाद कहि के खारिज कर दे जाथे। महतारी भाखा बर मया ह अलगाववाद नो हे। हिन्दी भासा के चिन्ता करइया मन क्षेत्रीय भासा के बात करई ल सांकुर सोंच कहि के खारिज करे म जोर देथे। क्षेत्रीय भासा के विकास म हिन्दी के कोनो नुकसान नइ हे। काबर के हिन्दी तो पूरा देस म बोले अउ समझे जाथे जबकि देस के अधिकतर प्रदेस के अपन-अपन क्षेत्रीय राजभासा अस्तित्व म हवय। उहां उही भासा म पढ़ई-लिखई अउ राजकाज के काम बुता होथे। हमर प्रदेस के मातृभासा छत्तीसगढ़ी आय। छत्तीसगढ़ी ल मान देबो तौ छत्तीसगढ़िया मन के मान बाढ़ही। छत्तीसगढ़िया मन के बढ़ोतरी झन होय कहि के छत्तीसगढ़ी ल हिन्दी बिरोधी बताना महतारी भाखा के बिरोधी अउ बिदेसी भासा अंगरेजी प्रेमी मन के चाल आय। महतारी भासा के हिमायती राज्य के उदाहरन हमर सामने हे। वो जम्मो के गिनती विकसित राज्य म होथे। वोमन अपन महतारी भाखा के माहत्तम बढ़ाय बर जीव-परान दे के भिड़े रहिथे ताकि क्षेत्रीय आम जनता के महत्व बाढ़े। क्षे़त्रीय भासा के परभाव ले प्रदेस अउ शहर के नांव बदले के कई ठी उदाहरन हमर सामने हे। मदरास के नांव तमिलनाडु, उड़ीसा के नांव ओडिसा, बंबई के नांव मुबंई, मद्रास के नांव चेन्नई, कलकत्ता के नांव कोलकाता, बेंगलोर के नांव बेंगलुरु अउ त्रिवेन्द्रम के नांव तिरुअनंतपुरम ल आज पूरा दुनिया ह बदलाव के साथ स्वीकार कर ले हे। दुनिया के कतको देस के नांव भासा के अधार में बदले के उदाहरन ल घलो हम जानथन। छत्तीसगढ़ के महतारी भाखा छत्तीसगढ़ी ह राजभासा आय। रायपुर ल मूल छत्तीसगढ़िया मन ‘रइपुर‘ कथे अउ जम्मो नामी साहित्यकार मन अपन रचना म रायपुर ल ‘रइपुर’ लिखथंय तौ राजभासा छत्तीसगढ़ी अउ छत्तीसगढ़िया मन के मान बढ़ाय बर राजधानी के नांव ‘नवा रइपुर‘ रखे बर काबर नइ सोंचना चाही? जरूर सोंचना चाही। इहां एक ठी बात धियान देय के लईक हे-अंगरेजी के इस्पेलिंग ल देखहू तौ उहू म Raipur ‘रइपुर‘ ही लिखे जाथे। हमर प्रदेस सरकार ये फैसला करय तौ ये समाचार ह पूरा देस के अखबार के सुर्खी बनही अउ छत्तीसगढ़ी भासा ल संविधान के आठवीं अनुसूची म सामिल करे बर जोरदार दबाव बनही जेखर बर आज ले हील-हवाला होत हवय। अगर इहां के रहवइया आम जनता अउ नेता मन ल छत्तीसगढ़ से प्यार हे तौ अइसन बदलाव बर हिरदे से तइयार होना चाही। हमर प्रदेस के मुखिया मंत्री ह कई पईत अपन छत्तीसगढ़ी परेम ल ओरखा चुके हवंय। अइसे लगथे धुंधरा छंटावत हे अउ हमर प्रदेस के मुखिया ह सुरुज बरोबर अंजोर बगरावत हे। उन हमला मउका दे हे के माथ ऊंच करके सब कोई बोल सकन-

‘‘मोर रइपुर नवा रइपुर’’
जै जोहार जै छत्तीसगढ़।

दिनेस चौहान
मो. 9826778806