नल जल योजना ले जल संकट वाले गांव मन म दूर होए लगे हे पेयजल के समस्या
कोरबा, 26 जुलाई 2024। कोरबा जिला के कोरबा विकासखण्ड के अंतर्गत पहाड़ ले घिरे विमलता गाँव हे। भले ए गांव म रहइया परिवार के संख्या बहुत जादा नइ हे, फेर पानी ल लेके इहां के समस्या बहुत बड़े हे। गर्मी का आईस? गाँव के हैंडपंप के जलस्तर नीचे जाय ले बोरिंग जवाब दे जात रहिस। ए गांव के मनखे मन ह अइसन कई गर्मी के मौसम देखे हे, जेन म ओ मन ल पानी के बूँद-बूँद बर मोहताज होए ल परे हे अउ उंखर आँखी ले आँसु के बूँद गिरे हे। अब जबकि गाँव म जल जीवन मिशन ले घर-घर नल लग गए हे त इहां पीए के पानी बर गर्मी के दिन म गांव वाले मन ल आँखी ले आँसु के बूंद नइ गिराना परय। गाँव म लगे नल अऊ घर के कनेक्शन ले ओ मन ल गर्मी अऊ बरसात म स्वच्छ पानी के धार मिल जात हे। ओ मन ल लगभग एक किलोमीटर दूर पहाड़ के नीचे मुसीबत मोल लेके खतरनाक ढोढ़ी म पानी भरे नइ जाना परत हे।
कोरबा ब्लाक के नकिया पंचायत अंतर्गत ग्राम विमलता म जल जीवन मिशन के माध्यम ले नल कनेक्शन घर-घर लगाए गए हे। जल संकट वाले ए ग्राम म हर साल गर्मी के दिन म पानी के समस्या विकराल हो जात रहिस।
