1.
नवा बसर मा नवा पहल होवय, मनखे परान परबल होवय।
शुभ चरितर अऊ सबो के भविष्य उज्जर होवय।।
नवा बसर मा नवा पहल होवय।
2.
मया मेहनत के पानी मा,
चीखला होवय ,माटी मा।
ऊपर तो फूलै खोखमा, पानी पवितर जल होवय।
नवा बसर मा नवा पहल होवय।
3.
टमडे़ ला झन परय कोनो जघा,
जगमग देवारी घर अंगना।
घपटे अंधियार झन टिकय झोपड़ी चाहे महल होवय।।
नवा बसर मा नवा पहल होवय।
4.
नवा धरती नवा अगास
नवा बिहनिया के हे आस
नवा-नवा सब बागबगिया
नवा – नवा फसल होवय।
नवा बसर मा नवा पहल होवय।
5.
नवा नवा महल अटारी
जस सबरी के सजे दुवारी
परतिच्छा के गुरतुर फर, सुदामा कस अटल होवय नवा बसर मा नवा पहल होवय।
6.
बड़का जिनगानी सहजे सरल,
मेहनत घी शक्कर के मीठा फर
सब के अंतस निर्मल बोहावत पवितर गंगा जमुन जल होवय।।
नवा बसर मा नवा पहल होवय।
7.
सबो झन सुखी, रहय सब निरोग।
मिटय जलन छल कलेश के भोग।।
दुखिया के सब दुख टरय सुख सब छल छल होवय नवा बसर मा नवा पहल होवय।
8.निरूत्तर बोकबाय काबर।
पेरय जेन अनथक जांगर
कड़क दुभ्भर सब प्रस्न के
कोनो न कोनो हल होवय नवा बसर मा नवा पहल होवय।
माधोलाल चन्द्राकर
वार्ड क्रं. 17 कादंबरी नगर
दुर्गा मंदिर के पास दुर्ग
जिला-दुर्ग (छ.ग.)
मो. नं. 9406062526
