छत्तीसगढ़ महतारी

अंचरा म फूले हे गोंदा

माथा म चमकथे चंदा

बगरे चंदैनी हे लुगरा म तोर

तहीं हर छत्तीसगढ़ महतारी अस मोर

भारत मां के दुलौरिन बेटी तोर सीतल छांव

तोर सरन म परे हावैं सहर नगर गांव

कोनो आईन हाथ पसारे

सरबस ल दे डारे

बांधे सब संग तैं मया के डोर

तोर नांव ल सुनिन सबो परदेसिहा भाई

करम ल गंठिया के झांकिन तोर दुवारी ल दाई

कोनो ल नई दुतकारे सबके करम ल संवारे

कर देहे सबके मुंह ल अंजोर

मंझ म सहर जगर-मगर छें-छें म गांव

बगरे हे सुग्घर अगरैया के छांव

खैरखा संकलावत हावै कमिया हर आवत हावै

लानत हे किसानीन हर भाजी ल टोर

बरसै कतको पानी जरै कतको घाम

तोर तप नई छोड़ै तोर बेटा किसान

घर के नागर तुतारी बन गिस तोर पुजारी

हांसिस अन्नपून्ना कोरा म तोर

राजिम अऊ सवरीनारायन तोर तीरथधाम

कर दिन पावन तोला लछिमन अऊ राम

हसदो हे हाथ ल जोरे , सीस शिवनाथ नवाए

महानदी लेवत हे चरनामृत तोर

तहीं हर छत्तीसगढ़ महतारी अस मोर