Categories
गीत

मोर छतीसगढ़ महान हे

छतीसगढ़ के पबरित भुईया जस गावत जहान हे
वीर जनमईया बलिदानी भुईया मोर छतीसगढ़ महान हे

होवत बिहनिया सुरुज के लाली नित नवा अंजोर बगरावय
मटकत रुखवा पुरवईया म डोंगरी पहाड़ी शोभा बढ़हावय
जन जन के हिरदे म मानवता मया के खदान हे
मोर छत्तीसगढ़ महान हे मोर छत्तीसगढ़ महान हे

करिया तन म मनखे ईहा सत ईमान के ढांचा
रिस्ता नाता जबर पोठ हे राम ईहा के भाचा
मया पीरा बर घेच कटईया मनखे गुणवान हे
मोर छत्तीसगढ़ महान हे मोर छत्तीसगढ़ महान हे

कल कल बोहावत महानदी संग पईरी सोंढुर के धारा
इन्दरा नाचय बस्तर घाटी म सुग्घर सजे चित्रकूट फुहारा
हीरा तोपाये ईहा माटी म रतनगरभा भुईया धनवान हे
मोर छत्तीसगढ़ महान हे मोर छत्तीसगढ़ महान हे

सुवा पंथी ददरिया गूँजय सरगुजिहा करमा नाचा
मीत मितानी मया बधना के सुग्घर ईहा साचा
कला सन्सकीरीति के धनी राज रंग रंग के विधान हे
मोर छत्तीसगढ़ महान हे मोर छत्तीसगढ़ महान हे

दीपक कुमार साहू
मोहदी मगरलोड