ये गीत कहिनी ला लइका मन नाटक बनाए घलो खेल सकत आहाएं एक झन बघवा बनही और बाकी लइका मन जनावर।
पाछू बाट जंगल कर परदा लगाए के, साज बाज संघे खेल सकथें।
पेटू बघवा पेटू बघवा
बन में आइस पेटू बघवा
(गुर्र गुर्र गुर्र)
जीभ लमाए-लप्पर लप्पर
लार चुहाए-टप्पर टप्पर
जंगल भर उदबास होय गईस
जे हर बढ़िस खलास होय गईस
घटिया सरना
परबत झरना
पतरा पतरी
घुटरा घुटरी
ओंगरी टोंगरी
टोंगरी ओंगरी
रोएट जनावर
छोएट जनावर
चरई चुनगुन
चुनमुन चुनमुन
खाते जाये अठर ललाए
जेहर आए पेट में जाए
(गड़प गड़प – गड़प गड़प)
दुई गो साम्हर
तीन गो चीतर
चार गो बरहा
आठ गो खरहा
भालु साथी
बंडा हाथी
भटकल घोड़ा
भंइस के जोड़ा
खाते जाए अउर ललाए
जेहर आए पेट में जाए
(गड़प गड़प – गड़प गड़प)
बदकत चितवा
बन के बिलवा
पातर हुंड़वा
मोट्टे चिड़वा
करिया मुस्टा
भुइरा सिकटा
साँपा गोजर
पंड़की तीतर
बकुला बकुली
फंफा फिफली
खाते जाए अउर ललाए
जेहर आए पेट में जाए
(गड़प गड़प गड़प)
बघवा एतना खाइस
अउ तनिको नईं सुस्ताइस
अड़बड खाए उसारिस
तब एकेच धार ढेंकारिस
(ढेंकार)
फुलिस जस गुब्बारा
फिन तन के बनिस नगाड़ा
डम डम डम डम डम
डिमिर डिमिर डम डम
पेट हवे कि कुंइया
छुए लागिस भुइंया
अब रेंगे नही सकाए
तो कइसे आए जाए
अब कइसे कइसे टसके
अउ कइसे कइसे मसके
तो बइठिस सुस्ताए बर
गछतरी में छंइहाए बर
गछ उपरी एगोट बन्दरा
बइठे रहिस लबरा
ओ लबरा बन्दरा हरखिस
अउ डहुरा में तरकिस
बघवा ला लगिस चिढ़ाए
अउ हाँस हाँस के गाए
(हा हा हा हा हा हा हा हा हा हा)
पेटू बघवा
पेटू बघवा
एतना काबर खाए
तैं एतना काबर खाए
कि रूख तरी थोसराए
पेटू बघवा
पेटू बघवा
बघवा जबर रिसाइस
फिन ठाढ़ होए गुर्राइस
(गुर्र गुर्र गुर्र)
नेरे पापी बन्दरा
बांच गए तैं लबरा?
उपरी आहुं
धएर के खाहूं
हाड़ा घलो चबाहूं
तोर हाड़ा घलो चबाहूं
बन्दरा हॉसत जाए
गाए अउर चिढ़ाए
तरके लीघे आए
बघवा ला जबर बिराए
बघवा हर तनिआइस
फिन उपरी आंख उठाइस
बिसर गइस जम दुख
अउ चहगे लागिस रूख
डिग डिग डिग डिग
डिग डिग डिग डिग
बघवा लीघे आइस
तो बन्दरा तरक छकाइस
त बघवा के रिस बरकिस
पातर डहुरा में तरकिस
डहुरा टूटिस
चड़ चड़ चड़ चड़ चड़ाक्
बघवा गिरिस
घुड़मुड़ घुड़मुड़ गद्ध
पेट फूटिस ढम्म-SS
हिंकले लागिन-जम्मSS
रोएट – जनावर
छोएट जनावर
चिरई चुरगुन
चुनमुन चुनमुन
दुइयो साम्हर
तीन गो चीतर
चाएर गो बरहा
आएठ गो खरहा
भालू साथी
बन्डा हांथी
भटकंल घोड़ा
भैंस के जोड़ा
बदकत चितवा
बन के बिलवा
पातर हुंडरा
मोट्टे चिड़रा
सांपा गोजर
पंड़की तीतर
बकूला बकुली
फंफा फिफली
जम्मों जनावर नाचे लागिन
नाच नाच के गाए लागिन
झिन बनिहा गो पेटू
झिन बनिहा गो पेटू
ये बघवा कर हाई
होए जाही रे भाई
पेटोच हर फूट जाही
परान घलो छुट जाही
झिन बनिहा गा पेटू
झिन बनिहागा पेटू
–अनिरूद्ध “नीरव”
सदर रोड, अम्बिकापुर
जिला-सरगुजा (छ.ग.)
मो. 9406340096