Categories
जीवन परिचय

नवा थियेटर के वरिष्ठ कलाकार अऊ रिंगनी-रवेली नाच पार्टी के जोक्‍कर उदय राम श्रीवास

छत्‍तीसगढ़ के माटी म एक ले बढ़के एक लोक कलाकार मन के जनम होए हे। ये धरती के लोक कलाकार मन देस-बिदेश म अपन कला के डंका बजाए हें, तइसनहे एक कलाकार उदय श्रीवास घलो ह रहिस। उदय श्रीवास हास्‍य अउ व्‍यत्‍पुन्‍नमि के जबर कलाकार रहिस, उमन रोवत दर्शक मन ल घलो हंसाए के सामरथ रखत रहिन। छत्‍तीसगढ़ी लोक कलाकार धन्‍नु सिन्‍हा के बताती, उदय श्रीवास मंजे कलाकार  भर नइ रहिन उमन  बेकस्टेज मे प्रस्तुति के पहिली एक-एक कलाकार मन के कपड़ा, वेश-भूषा उपर तको चेत करंय अउ अपन ले छोटे कलाकार मन के भरपूर सहयोग करयं।
उदय श्रीवास कई फिल्म मन म घलो काम करे हें जेमा बैंडिटक्‍वीन अऊ पीपली लाइव जइसे फिलिम के तको नाव हे। नवा थियेटर के प्रमुख नाटक मन म उदय श्रीवास ह अभिनय करत रहिन जेमा चरणदास चोर (शराबी, मंत्री), मोर नाव दमांद गांव के नाव ससुरार (झगलू मगलू देवार बुढ़वा दमांद), मिट्टी के गाड़ी, हिरमा के अमर कहानी (डीएसपी), लाला शोहरत राय (डांस मास्टर धनउ), पोंगा पंडित (अड़हा किसान), जहरीली हवा (मंत्री देवराज सिंह), जे लाहौर नइ वेख्या वो जन्मय नइ (टांगे वाला चायवाला), आगरा बाजार (ककड़ी वाले), सोनसागर (लोरिक) रहिस हे। छत्‍तीसगढ़ी नाचा रंगमंच के मंजे उदय श्रीवास रिंगनी-रवेली नाच पार्टी अऊ लखोली नाच पार्टी के प्रमुख जोकर रहिन। उदय श्रीवास ल नाचा के कई गम्‍मत अऊ छत्‍तीसगढ़ के कई लोक-कथा मुखाग्र याद रहिस। उदय श्रीवास 25 अप्रैल 2021 को ये दुनिया के रंग मंच बिदा ले लीन।
संजीव तिवारी